శ్రీ గురుభ్యో నమః
II ఆర్యా ద్విశతి - 116వ శ్లోకము II
సదనస్యానలకోణే సతతం ప్రణమామి కుండమాగ్నేయమ్ I
తత్ర స్థితం చ వహ్నిం తరళశిఖాజటిల మంబికాజనకమ్ II ౧౧౬
తాః సదనస్య - ఆ చింతామణి గృహమునకు, ఆనలకోణే - ఆగ్నేయ దిక్కునందు, ఆగ్నేయం - అగ్నిమయమైన, కుండమ్ - పల్లమును (కుండమును), తత్రస్థితం - అచ్చటనున్న, తరళశిఖాజటిలం - చలించుచున్న జ్వాలలచేత పూర్ణమైనదియు, అంబికానజకం - పార్వతీదేవికి తండ్రియైనవాడును అగు (చిదగ్నికుండసంభూత అని శ్రీలలితాదేవి నామము), వహ్నిం చ - అగ్నిని, సతతం - ఎల్లప్పుడూ, ప్రణమామి - నమస్కరించుచున్నాను !!
చింతామణిగృహమునకు ఆగ్నేయ దిక్కునందు అగ్నిమయమైన కుండమును, అందులో చలించుచున్న అగ్నిశిఖలచేత పూర్ణమైనవాడును, చిదగ్నికుండసంభూత యొక్క తండ్రిగా పేర్కొనబడిన అగ్నిదేవుని ఎల్లప్పుడూ నమస్కరించుచున్నాను !
II ఆర్యా ద్విశతి - 117వ శ్లోకము II
తస్యాసురదిశి తాదృశ రత్నపరిస్ఫురిత పర్వనవకాఢ్యమ్ I
చక్రాత్మకం శతాంగం దశయోజనమున్నతం భజే దివ్యమ్ II ౧౧౭
తాః తస్య - ఆ చింతామణి గృహము యొక్క, ఆసురదిశి - నైఋతి దిక్కునందు ఉండు, తాదృశ - ఆ చింతామణి గృహము నందు ఉన్న, రత్నపరిస్ఫురిత - రత్నములు, మణులచేత గొప్పగా ప్రకాశించుచున్న, పర్వనవకాఢ్యం - తొమ్మిది వరుసలతో కూడిన, దశయోజనమున్నతం - పదియోజనముల పొడవు కలిగినదియు, చక్రాత్మకం - చక్రములు కలదియు అగు, దివ్యం - ప్రకాశించుచున్న, శతాంగం - రథమును, భజే - సేవించుచున్నాను !!
చింతామణి గృహమునకు నైఋతి దిక్కునందు ఉన్న రత్నములచేత పొదగబడి గొప్పగా ప్రకాశించుచూ, తొమ్మిది వరుసలతో కూడి పదియోజనముల పొడవు కలిగినది, చక్రములు కలిగిన రథమును సేవించుచున్నాను !!
II ఆర్యా ద్విశతి - 118వ శ్లోకము II
తత్రైవ దిశి నిషణ్ణం తపనీయధ్వజ పరంపరాశ్లిష్టమ్ I
రథమపరం చ భవాన్యా రచయామో మనసి రత్నమయచూడమ్ II ౧౧౮
తాః తత్రైవ దిశి - ఆ నైఋతి దిక్కునందే, నిషణ్ణం - ఉన్నదియు, తపనీయధ్వజ - బంగారు ధ్వజము(పతాకముల) యొక్క, పరంపరా - వరుసలచేత, ఆశ్లిష్టం - కూడినదియు, రత్నమయచూడం - మణులమయమైన శిఖరము కలదియు, భవాన్యాః - పరమేశ్వరి యొక్క, అపరం చ రథం - వేరొక రథమును, మనసిరచయామః - ధ్యానించునున్నాము !!
చింతామణి గృహము నందు, నైఋతి దిక్కునందే ఉన్న బంగారు ధ్వజముతో కూడి, మణిమయ శిఖరము కలదియు అయిన శ్రీలలితాపరమేశ్వరి అమ్మవారి మరొక రథమును ధ్యానించుచున్నాను !!
II ఆర్యా ద్విశతి - 119వ శ్లోకము II
భవనస్య వాయుభాగే పరిష్కృతో వివిధ వైజయంతీభిః I
రచయత్యు ముదం రథేంద్రః సచివేశాన్యాః సమస్తవంద్యాయాః II ౧౧౯
తాః భవనస్య - ఆ చింతామణి గృహము యొక్క, వాయుభాగే - వాయువ్య దిక్కునందు ఉండు, వివిధ వైజయంతీభిః - నానావిధములైన పతాకములచేత, పరిష్కృతః - అలంకరింపబడిన, సమస్తవంద్యాయాః - సర్వులచేత వినుతింపబడిన, సచివేశాన్యాః - మంత్రిణీదేవత యొక్క, రథేంద్రః - రథశ్రేష్టము (దీనికి గేయచక్ర రథమని పేరు), ముదం రచయతు - సంతోషమును కలిగించుగాక !!
చింతామణి గృహము యొక్క వాయువ్య దిక్కునందు, నానావిధములైన పతాకముల చేత అలంకరింపబడినదియు, అందరిచేత నమస్కరింపబడిన, మంత్రిణీదేవి యొక్క గొప్పరథము (గేయచక్ర రథము), మాకు సంతోషమును కలుగజేయుగాక !! (ఓం శ్రీ గేయచక్రరాథారూఢమంత్రిణీపరిసేవి
II ఆర్యా ద్విశతి - 120వ శ్లోకము II
రుద్రదిశి రత్నధామ్నో రుచిరపతాకా ప్రపంచకంచుకితమ్ I
కుర్మో౨ధిహృదయ మనిశం క్రోడాస్యాయాః శతాంగమూర్ధన్యమ్ II ౧౨౦
తాః రత్నధామ్నః - ఆ చింతామణి గృహమునకు, రుద్రదిశి - ఈశాన్య దిక్కునందు ఉండు, రుచిర - సుందరమైన, పతాకా - పతాకముల యొక్క, కంచుకితం - కప్పబడినది అగు, క్రోడాస్యాయాః - వారాహీ అమ్మవారి యొక్క, శతాంగమూర్ధన్యం - శ్రేష్ఠమగు రథమును (కిరిచక్ర రథమును), అనిశం - ఎల్లప్పుడూ, అధిహృదయం కుర్మః - హృదయము నందు ధ్యానించుచున్నాను !!
చింతామణి గృహమునకు ఈశాన్య దిక్కునందు, సుందరమైన పతాకములచేత శోభిల్లుచున్న వారాహీఅమ్మవారి రథమును (కిరిచక్ర రథమును) ఎల్లప్పుడూ నా హృదయమునందు ధ్యానించుచున్నాను !!
(ఓం శ్రీ కిరిచక్రరథారూఢదండనాథాపురస్కృతా
( సశేషం .... )
సర్వం శ్రీవల్లీదేవసేనాంబికాసమేత శ్రీసుబ్రహ్మణ్యేశ్వరార్పణమస్తు
కామెంట్‌లు లేవు:
కామెంట్‌ను పోస్ట్ చేయండి