శ్రీ మూక పంచశతి - కటాక్ష శతకము - 5వ భాగం

ఓం శ్రీమాత్రే నమః

II మూక పంచశతి - కటాక్ష శతకం II (41-50 శ్లోకములు)

కామాక్షి సంతతమసౌ హరినీలరత్న-
స్తమ్భే కటాక్షరుచి పుంజమయే భవత్యాః I
బద్ధోಽపి భక్తినిగలైర్మమ చిత్తహస్తీ
స్తమ్భం చ బంధమపి ముంచతి హంత చిత్రమ్ II 41 II

కామాక్షి కాష్ణర్యమపి సంతతమంజనం చ
బిభ్రన్నిసర్గతరలోಽపి భవత్కటాక్షః I
వైమల్యమన్వహమనంజనతా చ భూయః
స్థైర్యం చ భక్త హృదయాయ కథం దదాతి II 42 II

మందస్మిత స్తబకితం మణి కుండలాంశు-
స్తోమప్రవాలరుచిరం శిశిరీకృతాశమ్ I
కామాక్షి రాజతి కటాక్షరుచేః కదంబమ్
ఉద్యానమంబ కరుణా హరిణేక్షణాయాః II 43 II

కామాక్షి తావక కటాక్ష మహేంద్ర నీల-

సింహాసనం శ్రితవతో మకరధ్వజస్య I

సామ్రాజ్యమంగళవిధౌ మణికుండలశ్రీః

నీరాజనోత్సవ తరంగిత దీపమాలా II 44 II

మాతః క్షణం స్నపయ మాం తవ వీక్షితేన

మందాక్షితేన సుజనైరపరోక్షితేన I

కామాక్షి కర్మతిమిరోత్కర భాస్కరేణ

శ్రేయస్కరేణ మధుపద్యుతితస్కరేణ II 45 II

ప్రేమాపగాపయసి మజ్జనమారచయ్య

యుక్తః స్మితాంశుకృత భస్మవిలేపనేన I

కామాక్షి కుండలమణిద్యుతిభిర్జటాలః

శ్రీకంఠమేవ భజతే తవ దృష్టిపాతః II 46 II

కైవల్యదాయ కరుణారస కింకరాయ

కామాక్షి కందలితవిభ్రమ శంకరాయ I

ఆలోకనాయ తవ భక్తశివంకరాయ

మాతర్నమోಽస్తు పరతన్త్రిత శంకరాయ II 47 II

సామ్రాజ్యమంగళవిధౌ మకరధ్వజస్య

లోలాలకాలికృత తోరణమాల్యశోభే I

కామేశ్వరి ప్రచలదుత్పలవైజయన్తీ-

చాతుర్యమేతి తవ చంచలదృష్టిపాతః II 48 II

మార్గేణ మంజుకచకాన్తి తమోవృతేన

మన్దాయమానగమనా మదనాతురాసౌ I

కామాక్షి దృష్టిరయతే తవ శంకరాయ

సంకేతభూమి మచిరాదభిసారికేవ II 49 II

వ్రీడనువృత్తి రమణీకృత సాహచర్యా

శైవాలితాం గలరుచా శశిశేఖరస్య I

కామాక్షి కాన్తిసరసీం త్వదపాంగలక్ష్మీః

మందం సమాశ్రయతి మజ్జనఖేలనాయ II 50 II

సర్వం శ్రీవల్లీదేవసేనాసమేత శ్రీసుబ్రహ్మణ్యేశ్వరార్పణమస్తు