శ్రీ మూక పంచశతి - మందస్మిత శతకము - 1వ భాగం

ఓం శ్రీ శివప్రియాయ నమః

II మూక పంచశతి - మందస్మిత శతకం II (1-10 శ్లోకములు)

బధ్రీమో వయమంజలిం ప్రతిదినం బన్ధచ్ఛిదే దేహినాం
కందర్పాగమతన్త్ర మూలగురవే కళ్యాణ కేళీభువే I
కామాక్ష్యా ఘనసార పుంజరజసే కామద్రుహశ్చక్షుషాం
మందార స్తబక ప్రభామదముషే మందస్మిత జ్యోతిషే II 1 II

సఘ్రీచే నవమల్లికాసుమనసాం నాసాగ్రముక్తామణేః
ఆచార్యాయ మృణాల కాండమహసాం నైసర్గికాయ ద్విషే I
స్వర్ధున్యా సహ యుధ్వనేహిమరుచేః అర్ధాసనాధ్యాసినే
కామాక్ష్యాః స్మితమంజరీధవళిమ అద్వైతాయ తస్మై నమః II 2 II

కర్పూర ద్యుతి చాతురీం అతితరాం అల్పీయసీం కుర్వతీ
దౌర్భాగ్యో దయమేవ సంవిదధతీ దౌషాకరీణాం త్విషామ్ I
క్షుల్లానేవ మనోజ్ఞ మల్లి నికరాన్ ఫుల్లానపి వ్యంజతీ
కామాక్ష్యా మృదులస్మితాంశులహరీ కామప్రసూరస్తు మే II 3 II

యా పీనస్తనమండలోపరి లసత్కర్పూరలేపాయతే
యా నీలేక్షణరాత్రి కాన్తితతిషు జ్యోత్స్నాప్రరోహాయతే I
యా సౌందర్యధునీతరఙ్గతతిషు వ్యాలోలహంసాయతే
కామాక్ష్యాః శిశిరీకరోతు హృదయం సా మే స్మితప్రాచురీ II 4 II

యేషాం గచ్ఛతి పూర్వపక్షసరణిం కౌముద్వతః శ్వేతిమా
యేషాం సంతతమారురుక్షతి తులాకక్ష్యాం శరచ్చన్ద్రమాః I
యేషామిచ్ఛతి కమ్బురప్య సులభాం అంతేవ సత్ప్రక్రియాం
కామాక్ష్యా మమతాం హరన్తు మమ తే హాసత్విషాం అఙ్కురాః II 5 II

ఆశాసీమసు సంతతం విదధతీ నైశాకరీం వ్యాక్రియాం
కాశానాం అభిమానభఙ్గ కలనా కౌశల్యమాబిభ్రతీ I
ఈశానేన విలోకితా సకుతుకం కామాక్షి తే కల్మష-
క్లేశాపాయకరీ చకాస్తిలహరీ మందస్మితజ్యోతిషామ్ II 6 II

ఆరూఢస్య సమున్నత స్తనతటీ సామ్రాజ్య సింహాసనం
కందర్పస్య విభోర్జగత్రయజయ ప్రాకట్యముద్రానిధేః I
యస్యాశ్చామరచాతురీం కలయతే రశ్మిఛ్ఛటా చంచలా
సా మందస్మితమంజరీ భవతు నః కామాయ కామాక్షి తే II 7 II

శంభోర్యా పరిరంభసంభ్రమవిధౌ నైర్మల్య సీమానిధిః
గైర్వాణీవ తరఙ్గిణీ కృత మృదుస్యన్దాం కళిన్దాత్మజామ్ I
కల్మాషీ కురుతే కళంకసుషమాం కంఠస్థలీచుంబినీం
కామాక్ష్యాః స్మితకందలీ భవతు నః కళ్యాణసందోహినీ II 8 II

జేతుం హారలతామివ స్తనతటీం సంజగ్ముషీ సంతతం
గంతుం నిర్మలతామివ ద్విగుణితాం మగ్నా కృపాస్త్రోతసి I

లబ్ధుం విస్మయనీయతామివ హరం రాగాకులం కుర్వతీ

మంజుస్తే స్మితమంజరీ భవభయం మథ్నాతు కామాక్షి మే II 9 II

శ్వేతాపి ప్రకటం నిషాకరరుచాం మాలిన్యమాతన్వతీ
శీతాపి స్మరపావకం పశుపతేః సంధుక్షయన్తీ సదా I
స్వాభావ్యాత్ అధరాశ్రితాపి నమతాం ఉచ్చైర్దిశంతీ గతిం
కామాక్షి స్ఫుటమన్తరా స్ఫురతు నః త్వన్మందహాసప్రభా II 10 II

 
సర్వం శ్రీవల్లీదేవసేనాసమేత శ్రీసుబ్రహ్మణ్యేశ్వరార్పణమస్తు